الأنامل الذهبية والصناعات التراثية "الفخاريات و الخزف"

 عمرك قبل كدا بصيت على عجله الفخار وهي بتدور وسألت نفسك تعرف ايه عن الصناعة الجميلة دي .. النهاردة هنعرف اكتر عن الفخار والخزف فتعالوا مع بعض في رحلة للتعرف على واحدة من أقدم الحرف اليدوية في التاريخ 

في البداية الفخار بشكل عام هو الطين وعشان كدا مصر اشتهرت بصناعة الفخار لان الطين كان متوفر على جانبي نهر النيل ولكن الفخار مش أي طين وخلاص عملية صناعة الفخار بتمر بكذا مرحلة  :

أول مرحلة تنقية الطين من الشوائب وبعدين الصانع بيزود عليه تبن ويدوس عليه برجله عشان يحضره للتشكيل بعدين بيبدأ يشكله على اكتر من شكل ولاكتر من غرض، وبعد ما ينتهي التشكيل بنيجي لمرحلة مهمة جدا وهي الحرق عن طريق ادخال الاواني دي في افران مخصصة ليها عشان لو فضلت طريه مش هنقدر نستعملها ولو نشفت زيادة عن اللزوم هتشقق وتتكسر عشان كدا المرحلة دي لازم فيها دقة وعشان المصريين من زمان ملوك الدقة انتجوا كمية كبيرة جدا من الاواني الفخارية اللي رافقت الملوك في مقابرهم وحتى انتجوا منها تماثيل للملوك المصريين وكانت بتتحط معاهم في المقابر .

ولأن مصر مر عليها حضارات كتير مختلفة سواء بطالمة أو رومان وكمان العصر الاسلامي كل دا بان اثره على الفخار من حيث النقوش والاشكال اللي موجودة عليه...

من أول ما بدأنا كلام عمالين نقول فخار بس دايما بيجي معاه الخزف فأيه الفرق اصلا بينهم الفخار اطرى من الخزف الخزف أصلب وساعات بيرن رغم أن الاتنين مصنوعين أصلا من نفس المواد اللي هي الطين أو الصلصال لكن طريقة التعامل مع الطين دا وتسخينه قبل التشكيل هي اللي بتفرق وكمان الخزف بيكون خارجه طبقة زجاج عشان كدا كل المسام فيه بتكون مسدودة غير ان الفخار نوع من الخزف فالخزف هو الاصل .

ومن المعلومات الجميلة عن الخزف والفخار إن اواني الخزف والفخار صحية جدا في حالة انها متطلتش باي مواد تانية وعشان كدا طعم المية في الجرة الفخار (الاولة) بيكون مميز جدا وتحسه مختلف عن المايه اللي بنشربها في العادي دا لانها مش بس بتحافظ على برودة الماية في الحر بل كمان بتساعد على الاحتفاظ بالمعادن فيها فكأنك بتشرب ماية معدنية وكمان ساقعة في الصيف .

ولو اتحمست بعد كل المعلومات دي  وحابب تنزل تشتري او حتى تتفرج على صناعة الفخار والخزف قدامك في اماكن كتير اوي في مصر تقدر تلاقي فيها الصناعة دي منها قرية الفخارين في الفسطاط في القاهرة وقرية المشهدي في الشرقية وقرية النزلة في الفيوم وقرية جريس في المنوفية ولو حابب تتعلم تقدر تروح مدرسة الفخار والخزف في عابدين .

لو بجد عايزين نتكلم عن الفخار والخزف وقد ايه هي من الصناعات المرتبطة بالارث المصري من الاف السنين مش هنحتاج مقال واحد بس.. لأن الصناعة دي من أرض البلد دي وهتفضل موجودة فيها وهتفضل تتطور طول ما المصريين عايشين على ارض مصر وفي النهاية بقا قولولنا اشتريتوا حاجة فخار قبل كدا ولا لا؟